Table of Contents
കേരളത്തിലെ ജില്ലകൾ
കേരളത്തിലെ ജില്ലകൾ: കേരളം ഇന്ത്യയിലെ ഒരു സംസ്ഥാനമാണ്. ഇതിന് 14 ജില്ലകളുണ്ട്, ഓരോ ജില്ലയെയും നിരവധി താലൂക്കുകളായി തിരിച്ചിരിക്കുന്നു. ജില്ലകൾ സംസ്ഥാനത്തിൻ്റെ അഡ്മിനിസ്ട്രേറ്റീവ് യൂണിറ്റുകളാണ്, മികച്ച ഭരണം ഉറപ്പാക്കുന്നതിനാണ് അവ വിഭജിച്ചിരിക്കുന്നത്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട് (കാലിക്കറ്റ്), വയനാട്, കണ്ണൂർ, കാസർകോട് എന്നിവയാണ് കേരളത്തിലെ ജില്ലകൾ.
| കേരളത്തിലെ ജില്ലകൾ | |
| Category | Malayalam GK , State GK, & Study Material |
| How many Districts in Kerala | 14 Districts |
| Topic Name | Districts of Kerala |
| Capital of Kerala | Thiruvananthapuram |
കേരളത്തിലെ ജില്ലകൾ മലയാളത്തിൽ
കേരളത്തിലെ ജില്ലകൾ മലയാളത്തിൽ: ഇന്ത്യയുടെ മലബാർ തീരത്തുള്ള ഒരു സംസ്ഥാനമാണ് കേരളം. കൊച്ചി, മലബാർ, സൗത്ത് കാനറ, തിരുവിതാംകൂർ എന്നീ പഴയ പ്രദേശങ്ങളിലെ മലയാളം സംസാരിക്കുന്ന പ്രദേശങ്ങൾ സംയോജിപ്പിച്ച് സംസ്ഥാന പുനഃസംഘടന നിയമം പാസാക്കിയതിനെത്തുടർന്ന് 1956 നവംബർ 1 ന് കേരളം രൂപീകരിച്ചു. മലയാളം ഏറ്റവും കൂടുതൽ സംസാരിക്കുന്ന ഭാഷയാണ്, കൂടാതെ സംസ്ഥാനത്തിന്റെ ഔദ്യോഗിക ഭാഷ കൂടിയാണ്. കേരളം 14 ജില്ലകളായി തിരിച്ചിരിക്കുന്നു, തലസ്ഥാനം തിരുവനന്തപുരമാണ്. കേരളത്തിലെ ജില്ലകളെക്കുറിച്ചുള്ള കൂടുതൽ വിവരങ്ങൾക്കായി ലേഖനം വായിക്കുക.
കേരളത്തിലെ ജില്ലകൾ: സമ്പൂർണ്ണ പട്ടിക
കേരളത്തിലെ ജില്ലകൾ- സമ്പൂർണ്ണ പട്ടിക: ഇന്ത്യയുടെ തെക്കുപടിഞ്ഞാറെ അറ്റത്തുള്ള സംസ്ഥാനമാണ്, കേരളം. തെക്കും കിഴക്കും തമിഴ്നാട്, വടക്കു കർണാടകം എന്നീ സംസ്ഥാനങ്ങളും പടിഞ്ഞാറ് അറബിക്കടലുമാണ്. പതിനൊന്നുമുതൽ 121 കിലോമീറ്റർവരെ വീതിയും 580 കിലോമീറ്റർ നീളവുമുള്ള അതിർത്തിയാണ് കേരളത്തിന്റെ. കേരളം 14 ജില്ലകളായി തിരിച്ചിരിക്കുന്നു, തലസ്ഥാനം തിരുവനന്തപുരമാണ്.
കേരളത്തിൽ പതിനാലു ജില്ലകളാണുള്ളത്. അവ താഴെപ്പറയുന്നവയാണ്
| കേരളത്തിലെ ജില്ലകൾ: പട്ടിക |
||
| SI.No | ജില്ലകൾ | സ്ഥാപിതമായത് |
| 1 | കാസർഗോഡ് | 24 മെയ് 1984 |
| 2 | കണ്ണൂർ | 1 ജനുവരി 1957 |
| 3 | വയനാട് | 1 നവംബർ 1980 |
| 4 | കോഴിക്കോട് | 1 ജനുവരി 1957 |
| 5 | മലപ്പുറം | 16 ജൂൺ 1969 |
| 6 | പാലക്കാട് | 1 ജനുവരി 1957 |
| 7 | തൃശ്ശൂർ | 1 നവംബർ 1956 |
| 8 | എറണാകുളം | 1 ഏപ്രിൽ 1958 |
| 9 | ഇടുക്കി | 26 ജനുവരി 1972 |
| 10 | കോട്ടയം | 1 നവംബർ 1956 |
| 11 | ആലപ്പുഴ | 1957 ഓഗസ്റ്റ് 17 |
| 12 | പത്തനംതിട്ട | 1 നവംബർ 1982 |
| 13 | കൊല്ലം | 1 നവംബർ 1956 |
| 14 | തിരുവനന്തപുരം | 1 നവംബർ 1956 |
കാസർഗോഡ്
കാസരം (കാട്ടുപോത്ത്) + കോട് (പ്രദേശം) എന്നതില്‍ നിന്നാണ് “കാസര്‍കോട്’ എന്ന പേര് ഉണ്ടായതെന്ന് പറയുന്നു.കേരളത്തിന്റെ വടക്കേയറ്റത്ത്‌ സ്ഥിതിചെയ്യുന്ന ജില്ല; താലൂക്ക്, ജില്ല-താലൂക്ക് ആസ്ഥാനപട്ടണം.
കാഞ്ഞിരക്കൂട്ടം എന്നർഥം വരുന്ന “കസിരക്കൂഡ്‌’ എന്ന പദത്തിൽനിന്നാണ്‌ സ്ഥലനാമത്തിന്റെ ഉദ്‌ഭവമെന്നും, കാസരം (കാട്ടുപോത്ത്) കോട് (പ്രദേശം) കാസർകോടായി പരിണമിച്ചതാണെന്നും അനുമാനിക്കപ്പെടുന്നു.
1956-ലെ സംസ്ഥാന പുനഃസംഘടനയെത്തുടർന്നാണ്‌ കർണാടകത്തിലെ തെക്കന്‍ കാനറയുടെ ഭാഗമായിരുന്ന ഈ പ്രദേശം കേരളത്തിന്റെ ഭാഗമായത്‌.
1984 വരെ കണ്ണൂർ ജില്ലയുടെ ഭാഗമായിരുന്ന ഹോസ്‌ദുർഗ്‌, കാസർകോട് താലൂക്കുകള്‍ ചേർന്ന് 1984 മേയ്‌ 24-ന് കാസർകോട് ജില്ല രൂപീകൃതമായി. കാസർകോട്, ഹോസ്‌ദുർഗ്‌ എന്നീ രണ്ടു താലൂക്കുകളാണ് കാസർകോട് ജില്ലയിലുള്‍പ്പെടുന്നത്‌.
കാസർകോട് താലൂക്കിൽ 82-ഉം ഹോസ്‌ദുർഗിൽ 45-ഉം ഗ്രാമപഞ്ചായത്തുകള്‍ ഉണ്ട് (2010). മഞ്ചേശ്വരം, കാസർകോട്, ഉദുമ, കാഞ്ഞങ്ങാട്‌, നീലേശ്വരം, ചെറുവത്തൂർ, പെറോള്‍ തുടങ്ങിയവ ജില്ലയിലെ പ്രധാന പട്ടണങ്ങളാണ്‌.
വിവിധ മതങ്ങളുടെ ആചാരങ്ങളും അനുഷ്ഠാനങ്ങളും അടുത്തടുത്ത് കാണാവുന്ന കാസര്‍കോടിനെ ദൈവങ്ങളുടെ നാട് എന്ന് വിശേഷിപ്പിക്കുന്നുണ്ട്. തിരുവനന്തപുരം ശ്രീപത്മനാഭസ്വാമിക്ഷേത്രവുമായി ബന്ധം ഉണ്ടെന്ന് ഐതിഹ്യങ്ങള്‍ പറയുന്ന അനന്തപുരം ജലക്ഷേത്രം കാസര്‍കോടാണ്.
മല്ലികാര്‍ജുനക്ഷേത്രം, കീഴൂര്‍ ശാസ്താക്ഷേത്രം, മാലിക് ദിനാര്‍ വലിയ ജുമാഅത്ത് പള്ളി, ബേക്കല്‍ കടല്‍ത്തീരം, കാപ്പില്‍ ബീച്ച്, വലിയ പറമ്പ കായല്‍, റാണിപുരം, മായിപ്പാടി കൊട്ടാരം തുടങ്ങിയവ കാസര്‍കോടാണ്.
ചന്ദ്രഗിരിപ്പുഴയാണ് നീളമുള്ള നദി. ഫിറിയ, ഉപ്പള, മഞ്ചേശ്വരം, കാര്യങ്കോട് ഇവ മറ്റ് പുഴകളാണ്.
സന്ദർശിക്കേണ്ട സ്ഥലങ്ങൾ
- കോട്ടപ്പുറം
- ബേക്കൽ കോട്ട
- നിത്യാനന്ദാശ്രമം
- ചന്ദ്രഗിരി കോട്ട
- ആനന്ദാശ്രമം
- റാണിപുരം
- കോട്ടഞ്ചേരി മലനിരകൾ
- ആനക്കല്ല് വെള്ളച്ചാട്ടം
- എടക്കാനം വെളളച്ചാട്ടം
- വലിയ പറമ്പ ( ഇടയിലക്കാട്)
- പൊസാടി ഗുംപെ
- മാലിക് ദിനാർ പള്ളി തളങ്കര
- മധൂർ ക്ഷേത്രം
- ചെമ്പരിക്ക ബീച്ച്
- പള്ളിക്കര ബീച്ച്
- തേൻവാരിക്കല്ല് വെള്ളച്ചാട്ടം
- അനന്തപുര തടാക ക്ഷേത്രം
- അഴിത്തല ബീച്ച്
കണ്ണൂർ
കാനാമ്പുഴ ഒഴുകിയിരുന്ന കാനത്തൂർ ഗ്രാമമാണ് പിന്നീട് കണ്ണൂർ എന്ന പേരിൽ അറിയപ്പെട്ടതെന്നാണ്ഒരു അഭിപ്രായം.
കണ്ണന്റെ ഊര് കണ്ണൂരായെന്നും വിശ്വസിക്കുന്നവരുണ്ട്. ക്രിസ്തുവിന് ശേഷം രണ്ടാം നൂറ്റാണ്ടിൽ ജീവിച്ചിരുന്ന ഗ്രീക്ക് പണ്ഡിതനായ ടോളമി ഇന്ത്യയുടെ പടിഞ്ഞാറൻ തീര തുറമുഖങ്ങളെ പരാമർ‍ശിക്കവേ കനൗറ എന്ന് സൂചിപ്പിക്കപ്പെട്ടിട്ടുണ്ട്.
ക്രിസ്തുവിന് ശേഷം 14-ാം നൂറ്റാണ്ടിൽ മലബാർ സന്ദർ‍ശിച്ച ഫ്രിയർ ജോർ‍ഡാനസ് ആണ് കാനനൂർ എന്ന് ആദ്യം രേഖപ്പെടുത്തിയത്.
വടക്ക് കാസർഗോഡ് ജില്ല, കിഴക്ക് കർണ്ണാടക സംസ്ഥാനത്തിലെ കൂർഗ്ഗ്‌ ജില്ല, തെക്ക് പുതുച്ചേരി കേന്ദ്രഭരണപ്രദേശത്തിന്റെ ഭാഗമായ മയ്യഴി, വയനാട്, കോഴിക്കോട് എന്നീ ജില്ലകൾ, പടിഞ്ഞാറ് അറബിക്കടൽ എന്നിവയാണ് കണ്ണൂർ ജില്ലയുടെ അതിർത്തികൾ.
കേരളത്തിന്റെവടക്കെ അറ്റത്തു നിന്നും രണ്ടാമതായി സ്ഥിതി ചെയ്യുന്ന ജില്ലയാണ് കണ്ണൂർ. കണ്ണൂർ നഗരമാണ് ഇതിന്റെ ആസ്ഥാനം.
വലിപ്പത്തിന്റെ കാര്യത്തിൽ കേരളത്തിൽ ഒമ്പതാം സ്ഥാനത്താണ്.ജില്ലയുടെ തെക്ക് പടിഞ്ഞാറ് ഭാഗങ്ങൾ പരമ്പരാഗത ഉത്തരകേരള സംസ്കാരം നിലനിർത്തുമ്പോൾ, കിഴക്കൻ പ്രദേശങ്ങൾ മധ്യകേരളത്തിൽ നിന്നും കുടിയേറിയ തിരുവിതാംകൂർ സംസ്കാരം പുലർത്തുന്നു.
ആചാരങ്ങളിലും ഭാഷയിലുമെല്ലാം ഈ വ്യത്യാസം മനസ്സിലാക്കാം. അറുപതുകളിലും എഴുപതുകളിലും ഉണ്ടായ തിരുവിതാംകൂറിൽ നിന്നുമുള്ള ക്രൈസ്തവ കുടിയേറ്റം ഈ ജില്ലയുടെ കാർഷിക-വിദ്യാഭ്യാസ മുന്നേറ്റത്തെ വളരെ സഹായിച്ചിട്ടുണ്ട്.
കണ്ണൂർ ജില്ലയുടെ പ്രധാന സാമ്പത്തിക സ്രോതസ്സ് മലയോരമേഖലയിൽനിന്നുള്ള കാർഷിക വരുമാനം ആണ്.
സന്ദർശിക്കേണ്ട സ്ഥലങ്ങൾ
- പയ്യാമ്പലം കടപ്പുറം
- കണ്ണൂർ കോട്ട
- മീൻ‌കുന്ന് കടപ്പുറം
- ഏലപ്പീടിക
- മുഴപ്പിലങ്ങാട്‌ കടപ്പുറം
- ചിറക്കൽ കൊട്ടാരം
- മലയാള കലാഗ്രാമം
- പഴശ്ശി അണക്കെട്ട്
- മാപ്പിള ബേ
- ഗുണ്ടർട്ട് ബംഗ്ലാവ്
- അറയ്കൽ കൊട്ടാരം
- പെരളശ്ശേരി തൂക്കു പാലം
- കൊട്ടിയൂർ ക്ഷേത്രം
- ആറളം ഫാം
- സെന്റ് ആഞ്ജലോ കോട്ട
- വൈതൽ മല
- ചിറക്കൽ ചിറ
- കേരള ഫോക്ലോർ അക്കാദമി
- മുണ്ടേരിക്കടവ് പക്ഷിസങ്കേതം
- കണ്ണൂർ അന്താരാഷ്ട്ര വിമാനത്താവളം
- മാടായിപ്പാറ
- പാലക്കയംതട്ട്
- അണ്ടലൂർകാവ്
- കാപ്പാട്ടുകാവ്
- മാവിലാക്കാവ്
- പാലോട്ട് കാവുകൾ
- മന്ദനാർപാടി
- മാടായിക്കാവ്
- കളരി വാതിൽക്കൽ ഭഗവതിക്കാവ്
- കുന്നത്തൂർ പാടി
- പറശ്ശിനി മടപ്പുര
വയനാട്
കേരള സംസ്ഥാനത്തിലെ ഒരു ജില്ലയാണ് വയനാട്. കൽ‌പറ്റയാണ് ജില്ലയുടെ ആസ്ഥനം. കേരളത്തിലെ പന്ത്രണ്ടാമത് ജില്ലയായി 1980 നവംബർ ഒന്നിനാണ് വയനാട് ജില്ല രൂപം കൊണ്ടത്.
“വയൽ നാട്” എന്ന പ്രയോഗത്തിൽ നിന്നാണ് വയനാട് എന്ന പേരുണ്ടായത്. കോഴിക്കോട് , കണ്ണൂർ എന്നീ ജില്ലകളുടെ ഭാഗമായിരുന്ന സ്ഥലങ്ങൾ അടർത്തിയെടുത്താണ് വയനാടിനു രൂപം കൊടുത്തത്.
കബനി നദിയാണ്‌ ഈ ജില്ലയിലൂടെ ഒഴുകുന്ന പ്രധാന നദി. കർണാടക, തമിഴ്നാട് സംസ്ഥാനങ്ങളുമായി അതിർത്തി പങ്കിടുന്ന കേരളത്തിലെ ഏക ജില്ലയാണ് വയനാട്.
വയനാട് ജില്ലയുടെ മൊത്തം വിസ്തൃതി 2131 ചതുരശ്ര കിലോമീറ്ററാണ്, ഭൂവിഭാഗത്തിന്റെ 38 ശതമാനവും വനമാണ്.
സന്ദർശിക്കേണ്ട സ്ഥലങ്ങൾ
- എടക്കൽ ഗുഹ
- കാന്തൻപാറ വെള്ളച്ചാട്ടം
- കാരാപ്പുഴ അണക്കെട്ട്
- കിടങ്ങനാട് ബസ്തി
- കുറുവദ്വീപ്
- കായക്കുന്ന്
- ചങ്ങലമരം
- ചെമ്പ്ര കൊടുമുടി
- തിരുനെല്ലിക്ഷേത്രം
- പഴശ്ശിരാജ സ്മാരകം
- പക്ഷിപാതാളം
- പൂക്കോട് തടാകം
- ബത്തേരി ജൈനക്ഷേത്രം
- ബാണാസുര സാഗർ അണക്കെട്ട്
- ബ്രഹ്മഗിരി മലനിരകൾ
- മീന്മുട്ടി വെള്ളച്ചാട്ടം
- മുത്തങ്ങ
- വയനാട് വന്യജീവി സം‌രക്ഷണകേന്ദ്രം
- സൂചിപ്പാറ വെള്ളച്ചാട്ടം
- കർളാട് തടാകം
കോഴിക്കോട്
കോഴിക്കോട്, കേരള സംസ്ഥാനത്തിന്റെ വടക്കുവശത്തുള്ള ഒരു ജില്ലയാണ്. ഇന്ത്യയുടെ തെക്കുപടിഞ്ഞാറൻ തീരപ്രദേശത്താണ്‌ ഈ ജില്ലയുടെ സ്ഥാനം.
വടക്ക് കണ്ണൂർ ജില്ല, തെക്ക് മലപ്പുറം ജില്ല, കിഴക്ക് വയനാട് ജില്ല, പടിഞ്ഞാറ് അറബിക്കടൽ എന്നിവയാണ് കോഴിക്കോടിന്റെ അതിർത്തികൾ.
കേരളത്തിലെ മഹാനഗരങ്ങളിൽ ഒന്നായ കോഴിക്കോട് നഗരമാണ് ജില്ലയുടെ ആസ്ഥാനം.
കോഴിക്കോടിനെപ്പറ്റി എട്ടാം നൂറ്റാണ്ടിനു ശേഷം മാത്രമേ ചരിത്രത്തിൽ കൂടുതൽ പ്രതിപാദിച്ചുകാണുന്നുള്ളൂ.
എട്ട് മുതൽ പന്ത്രണ്ട് നൂറ്റാണ്ടുകൾ വരെ കോഴിക്കോടിന്റെ ആധിപത്യം പോർളാതിരിമാർക്കായിരുന്നു. ഇവരുടെ കാലത്ത് തൊഴിലധിഷ്ഠിതമായും ജാതിവ്യവസ്ഥക്കധിഷ്ഠിതമായും സാമൂഹ്യജീവിതം ക്രമീകരിക്കപ്പെട്ടു, അതിനുമുന്ന് വിവേചനരഹിതമായിരുന്നു ഒട്ടുമിക്ക സമൂഹങ്ങളിലും വ്യവസ്ഥിതികൾ.
ഗോത്രപ്രമാണിമാർ ഭൂവുടമകളായും നാടുവാഴികളായും ഉയർത്തപ്പെട്ടു. മറ്റുള്ളവർ അവർക്കു വിധേയരായി കൃഷി ചെയ്തു കഴിഞ്ഞു വന്നു. സാമൂതിരി കോഴിക്കോടിന്റെ അധിപതി ആയതോടെ അറബികളുടെ സഹായത്താൽ വാണിജ്യകേന്ദ്രം എന്ന നിലയിൽ കോഴിക്കോടിനു പ്രാധാന്യം ഏറി.
മറ്റു രാജക്കന്മാരെ തോല്പിക്കാൻ സാമൂതിരിക്ക് മുസ്ലീങ്ങൾ നല്ല സഹായം ചെയ്തു വന്നു. അങ്ങനെ കൊച്ചി വരെയുള്ള പ്രദേശങ്ങളുടെ അധിപനായി സാമൂതിരി മാറി.
കേരളത്തിന്റെ തെക്കൻ ജില്ലകളിൽ നിന്നും വ്യത്യസ്തമായ ജീവിതശൈലിയും സംസ്കാരവുമാണ്‌ കോഴിക്കോട് ജില്ലയിലെ ജനങ്ങൾ പിന്തുടരുന്നത്‌.
മുസ്ലീം സംസ്കാരത്തിന്റെ സ്വാധീനം കൊണ്ടാവാം ഇവിടത്തെ ജനങ്ങളുടെ സംസാരിക്കുന്ന മലയാളത്തിൽ അറബി ഭാഷയുടെ കലർപ്പുകാണാം.
നൂറ്റാണ്ടുകൾക്കു മുന്നേ തന്നെ വ്യാപാരങ്ങൾ നടന്നിരുന്നതിനാൽ പല രാജ്യക്കാരുടെയും സംസ്കാരവുമായി ഇഴുകിച്ചേർന്നാണ് കോഴിക്കോട് രൂപം പ്രാപിച്ചത്.
വിനോദസഞ്ചാര കേന്ദ്രങ്ങൾ
- മാനാഞ്ചിറ സ്ക്വയർ
- കോഴിക്കോട് കടൽ തീരം
- ബേപ്പൂർ തുറമുഖം
- കൊയിലാണ്ടി കൊല്ലം ശ്രീ പിഷാരികാവ് ക്ഷേത്രം
- വാനനിരീക്ഷണ കേന്ദ്രം
- താമരശ്ശേരി ചുരം
- കക്കയം ഡാം
- തുഷാര ഗിരി വെള്ളച്ചാട്ടം
- കടലുണ്ടി
- കാപ്പാട് കടൽ തീരം
- കടൽമത്സ്യ അക്കോറിയം
- പെരുവണ്ണാമുഴി ഡാം
- വെള്ളരിമല
- ലോകനാർകാവ് ക്ഷേത്രം
- വെസ്റ്റ് ഹിൽ അക്വേറിയം
- ഈസ്റ്റ് ഹിൽ പഴശ്ശിരാജാ മ്യൂസിയം
- ഈസ്റ്റ് ഹിൽ കൃഷ്ണമേനോൻ ആർട്ട് ഗാലറി
- ഇരിങ്ങൽ ശിൽപഗ്രാമം
- പോന്മേരി ശിവക്ഷേത്രം
- വയലട
മലപ്പുറം
വടക്ക് കോഴിക്കോട്, വയനാട് ജില്ലകൾ, വടക്കു കിഴക്കു വശത്ത് തമിഴ്‌നാട്ടിലെ നീലഗിരി ജില്ല, തെക്കുഭാഗത്തും തെക്കു കിഴക്കു വശത്തുമായി പാലക്കാട് ജില്ല.
തെക്കു പടിഞ്ഞാറു വശത്തായി തൃശ്ശൂർ ജില്ല, പടിഞ്ഞാറ് അറബിക്കടൽ ഇവയാണ് മലപ്പുറം ജില്ലയുടെ അതിർത്തികൾ.
കേരളത്തിന്റെ വടക്കെ അറ്റത്തു നിന്നും അഞ്ചാമതായി സ്ഥിതി ചെയ്യുന്ന ജില്ലയാണ് മലപ്പുറം. മലപ്പുറം നഗരമാണ് ജില്ലയുടെ ആസ്ഥാനം. ജനസാന്ദ്രതയേറിയ ജില്ലകളിൽ ഒന്നാണിത്.
ഏറ്റവും കൂടുതൽ ഗ്രാമപഞ്ചായത്തുകൾ. 2001-ലെ സെൻസസ് പ്രകാരം 3,629,640 പേർ അധിവസിക്കുന്നു. 3550 ചതുരശ്ര കിലോമീറ്ററാണിതിന്റെ വിസ്തൃതി.1969 ജൂൺ 16-നാണ് മലപ്പുറം ജില്ല രൂപീകൃതമായത്. 7 താലൂക്കുകളും 15 ബ്ലോക്ക് പഞ്ചായത്തുകളും 94 ഗ്രാമപഞ്ചായത്തുകളും ജില്ലയിലുണ്ട്.
മലപ്പുറം, മഞ്ചേരി, കൊണ്ടോട്ടി,തിരൂർ, പൊന്നാനി,പെരിന്തൽമണ്ണ, നിലമ്പൂർ, കോട്ടക്കൽ , വളാഞ്ചേരി, താനൂർ, പരപ്പനങ്ങാടി, തിരൂരങ്ങാടി, എന്നിവയാണ് ജില്ലയിലെ 12 നഗരസഭകൾ.
കേരളത്തിന്റെ തനതായ സാംസ്കാരിക പൈതൃകത്തിന് വളരെയേറെ സംഭാവനകൾ നൽകിയിട്ടുള്ള പ്രദേശമാണ് ഇന്നത്തെ മലപ്പുറം ജില്ല.
കോഴിക്കോട് സാമൂതിരിയുടെ യഥാർഥ തലസ്ഥാനമായിരുന്ന നെടിയിരുപ്പും കൊച്ചി രാജാവിന്റെ യഥാർഥ തലസ്ഥാനമായിരുന്ന പെരുമ്പടപ്പും പാലക്കാട് രാജാവിന്റെ ആദ്യകാല ആസ്ഥാനവും ആഴ്വാഞ്ചേരി തമ്പ്രാക്കളുടെ കേന്ദ്രവുമായിരുന്ന ആതവനാടും വള്ളുവനാട് രാജവംശത്തിന്റെ ആസ്ഥാനമായ അങ്ങാടിപ്പുറവും ഇന്ന് സ്ഥിതി ചെയ്യുന്നത് മലപ്പുറം ജില്ലയുടെ ഭൂപടത്തിലാണ്. തിരുവിതാംകൂർ രാജവംശത്തിലേക്ക് അംഗങ്ങളെ ദത്തെടുത്തിരുന്ന പരപ്പനാടു രാജവംശത്തിന്റെ ആസ്ഥാനം മലപ്പുറം ജില്ലയിലെ പരപ്പനങ്ങാടിയും കൊച്ചി രാജവംശത്തിലേക്ക് ദത്തെടുത്തിരുന്ന വെട്ടത്തു സ്വരൂപത്തിന്റെ ആസ്ഥാനം ഇതേ ജില്ലയിലെ താനൂർ നഗരവുമായിരുന്നു.
കേരള വർമ വലിയ കോയി തമ്പുരാൻ, രാജ രാജ വർമ, രാജാരവിവർമ മുതലായവർ പരപ്പനാടു രാജവംശത്തിലെ അംഗങ്ങളായിരുന്നു.
മലപ്പുറം ജില്ലയുടെ ഭാരതപ്പുഴയോരത്തുള്ള തിരുനാവായ, തൃപ്രങ്ങോട്, പൊന്നാനി മുതലായ പ്രദേശങ്ങൾക്ക് പുരാതന മധ്യകാല കേരള ചരിത്രത്തിൽ സവിശേഷമായ സ്ഥാനമാണുള്ളത്.
തിരുനാവായയിലെ മാമാങ്കം മധ്യ കാല കേരളത്തിന്റെ രാഷ്ട്രീയ ഗതി നിർണയിച്ചിരുന്നു. ചരിത്ര പ്രാധാന്യമേറിയ ഏറനാട്, വള്ളുവനാട്, വെട്ടത്തുനാട്, എന്നീ പ്രദേശങ്ങളെ സംയോജിപ്പിച്ചു കൊണ്ടാണ് മലപ്പുറം ജില്ല രൂപമെടുക്കുന്നത്.
വിനോദസഞ്ചാര കേന്ദ്രങ്ങൾ
- തിരൂർ തുഞ്ചൻപറമ്പ്
- നിലമ്പൂർ
- തിരുമാന്ധാംകുന്ന് ക്ഷേത്രം
- തിരുനാവായ നാവാമുകുന്ദക്ഷേത്രം
- പൊന്നാനി ബിയ്യം കായൽ
- കോട്ടകൽ
- കടലുണ്ടി പക്ഷിസങ്കേതം
- നെടുങ്കയം
- കോട്ടക്കുന്ന്
- ചെറുപടിയം മല
- അരിയല്ലൂർ കടപ്പുറം
- പരപ്പനങ്ങാടി
- ന്യൂ കട്ട് പാലത്തിങ്ങൽ
- പൂച്ചോലമാട്
- ചെരുപ്പടി മല
- കൊടികുത്തിമല
- പന്തല്ലൂർ മല
- കരുവാരകുണ്ട്
- കേരളാം കുണ്ട് വെള്ളച്ചാട്ടം
- ചിങ്ങകല്ല് വെള്ളച്ചാട്ടം
പാലക്കാട്
പാലക്കാട് കേരളത്തിലെ ഒരു ജില്ലയാണ്. ആസ്ഥാനം പാലക്കാട് നഗരം. കേരളത്തിലെ ഏറ്റവും വലിയ ജില്ലയാണ് ഇത്. 2006 ലാണ് പാലക്കാടിന്‌ ഏറ്റവും വലിയ ജില്ല എന്ന പദവി ലഭിച്ചത്‌.
അതിനു മുൻപ് ഇടുക്കി ജില്ല ആയിരുന്നു കേരളത്തിലെ ഏറ്റവും വലിയ ജില്ല. ഇടുക്കി ജില്ലയിലെ കൂട്ടമ്പുഴ പഞ്ചായത്ത് എറണാകുളം ജില്ലയോട് ചേർത്തതോടെയാണ്‌ ഇടുക്കി ജില്ലയ്ക് ഒന്നാം സ്ഥാനം നഷ്ടപെട്ടത്.
തെക്ക് തൃശ്ശൂർ, വടക്ക് മലപ്പുറം, കിഴക്ക് തമിഴ്‌നാട്ടിലെ കോയമ്പത്തൂർ ജില്ല എന്നിവയാണ് സമീപ ജില്ലകൾ. ഭാരതപ്പുഴയാണ്‌ പ്രധാന നദി.
പശ്ചിമ ഘട്ടത്തിലെഏക കവാടം പാലക്കാട് ജില്ലയിലെ വാളയാർ ചുരമാണ്. ഈ ചുരത്തിന്റെ സാന്നിധ്യം മൂലം കേരളത്തിലെ ഇതര ജില്ലകളിൽ നിന്നു വ്യത്യസ്തമായി ഇവിടെ തമിഴ്‌നാട്ടിലേതുപോലെ വരണ്ട കാലാവസ്ഥയാണ്. കേരളപ്പിറവിക്കു മുൻപ് ഈ ജില്ല മദ്രാസ് പ്രസിഡൻ‌സിയുടെ ഭാഗമായിരുന്നു.
നെടുംപൊറൈയൂർ സ്വരൂപമായിരുന്നു ആദ്യ പാലക്കാട് രാജകുടുംബം. എ. ഡി. ഒന്നാം നൂറ്റാണ്ടിൽ ‘പൊറൈനാട്‌’ എന്നായിരുന്നു പാലക്കാടിന്റെ പേര്[അവലംബം ആവശ്യമാണ്]. 1363-ൽ കോഴിക്കോട് സാമൂതിരി പാലക്കാട് പിടിച്ചടക്കി.
പാലക്കാട് രാജാവ് കോമി അച്ചൻ മൈസൂർരാജാവിന്റെ സഹായം തേടി. മൈസൂർ സൈന്യം വന്നപ്പോഴേക്കും സാമൂതിരി നാടുവിട്ടു. പിന്നീട് ഹൈദരാലി പാലക്കാട് പിടിച്ചു. ഹൈദരാലിയുടെ (1766-1777) കാലത്ത് നിർമിച്ചതാണ്‌ ഇന്നു കാണുന്ന പാലക്കാട് കോട്ട.
സാമൂതിരിയും ബ്രിട്ടീഷുകാരും ചേർന്ന് 1783-ൽ ഈ കോട്ട പിടിച്ചെടുത്തെങ്കിലും ടിപ്പു സൈന്യവുമായി വന്നപ്പോൾ സാമൂതിരി പിൻമാറി. ടിപ്പുവും ഇംഗ്ലീഷുകാരും തമ്മിൽ നടന്ന യുദ്ധത്തേത്തുടർന്ന് 1792-ൽ പാലക്കാട് ബ്രിട്ടീഷ് അധീനതയിലായി.ബ്രിട്ടീഷ് ഭരണകാലത്ത് മദ്രാസ് ദേശത്തിന് കീഴിലെ മലബാർ ജില്ലയുടെ ഭാഗമായിരുന്നു പാലക്കാട്.
സ്വാതന്ത്ര്യ ത്തിന് ശേഷം അത് മദ്രാസ് സംസ്ഥാനത്തിന് കീഴിലായി. 1956-ൽ കേരളം രൂപീകൃതമായപ്പൊൾ സംസ്ഥാനത്തിന് കീഴിലെ ഒരു പ്രത്യേക ജില്ലയായി പാലക്കാട് മാറ്റപ്പെട്ടു.
1957 ജനുവരി ഒന്നിനാണ് പാലക്കാട് ജില്ല രൂപം കൊണ്ടത്. അന്നത്തെ മലബാർ ജില്ലയെ മൂന്നായി വിഭജിച്ച്‌ പാലക്കാട്, കണ്ണൂർ, കോഴിക്കോട് എന്നീ ജില്ലകൾ രൂപവത്കരിക്കുകയായിരുനു. അന്ന് തൃശൂർ ജില്ലയിലായിരുന്ന ആലത്തൂർ, ചിറ്റൂർ താലൂക്കുകൾ പാലക്കാടിനൊപ്പം ചേർക്കുകയും മലബാറിന്റെ ഭാഗമായിരുന്ന ചാവക്കാട്‌ തൃശൂരിനു കൊടുക്കുകയും ചെയ്തു.
തൃശ്ശൂർ
പടിഞ്ഞാറ് അറബിക്കടൽ, വടക്ക് മലപ്പുറം ജില്ല, കിഴക്ക് പാലക്കാട് ജില്ല,തമിഴ്നാട് സംസ്ഥാനത്തിന്റെ കോയമ്പത്തൂർ ജില്ല , തെക്ക് ഇടുക്കി ജില്ല, എറണാകുളം ജില്ല ജില്ലകൾ എന്നിവയാണ് തൃശൂർ ജില്ലയുടെ അതിർത്തികൾകേരള സംസ്ഥാനത്തിന്റെ മദ്ധ്യഭാഗത്ത് സ്ഥിതി ചെയ്യുന്ന ഒരു ജില്ലയാണ് തൃശ്ശൂർ (തൃശ്ശിവപേരൂർ).
കേരളത്തിന്റെ സാംസ്കാരിക തലസ്ഥാനമായി തൃശ്ശൂർ അറിയപ്പെടുന്നു. സമുദ്രനിരപ്പിൽ സ്ഥിതിചെയ്യുന്ന ഈ ജില്ലയ്ക്ക് 3032 ച.കി. വിസ്തീർണ്ണമുണ്ട്. ആസ്ഥാനം തൃശൂർ നഗരം ആണ്.
നഗരത്തിന്റെ മദ്ധ്യഭാഗത്തായി ഒരു ചെറുകുന്നിൻപുറത്ത് ശ്രീവടക്കുംനാഥൻ ക്ഷേത്രം സ്ഥിതി ചെയ്യുന്നു. തൃശൂർ ജില്ലക്ക് ആകെ 7 താലൂക്കുകളാണ് ഉള്ളത്.
പെരൂർ അഥവാ പെരിയഊർ (വലിയ നാട്) എന്നതിനോട് തിരുശിവ എന്ന വിശേഷണം ചേർന്നതാണ് യഥാർത്ഥത്തിൽ തൃശ്ശിവപേരൂർ ആയത് എന്ന് ചരിത്രകാരനായ വി.വി.കെ.വാലത്ത് തന്റെ പ്രസിദ്ധമായ കേരളത്തിലെ സ്ഥലചരിത്രങ്ങൾ എന്ന ഗ്രന്ഥത്തിൽ പറയുന്നു.
ശൈവമതത്തിന്റെ ദക്ഷിണേന്ത്യയിലേക്കുള്ള ചരിത്രപരമായ പ്രയാണത്തെയാണ്‌ കേരളമാഹാതമ്യത്തിൽ പറയുന്ന ഐതിഹ്യം ഭംഗ്യന്തരേണ സൂചിപ്പിക്കുന്നത്.
1750 ക്രി.വ. മുതൽ 1762 വരെ തൃശ്ശൂരും, വടക്കുന്നാഥ ക്ഷേത്രവും സാമൂതിരിയുടെ നിയന്ത്രണത്തിലായിരുന്നു. വടക്കേക്കരകോവിലകം (ഇന്നത്തെ ശക്തൻ തമ്പുരാൻ കൊട്ടാരം ) ആയിരുന്നു അദ്ദേഹത്തിന്റെ കേന്ദ്രം.
അതിനു മുൻപ് സാമൂതിരി കൊച്ചി രാജാവ് അന്ന് താമസിച്ചിരുന്ന വടക്കേക്കരകോവിലകം ഒരു തുള്ളി ചോര പോലും ചിന്താതെ പിടിച്ചത് ഒരു ചരിത്ര സംഭവമാണ്.
തൃശ്ശൂരിലെ നമ്പൂതിരിമാർ ഇടപ്പള്ളി രാജാ കൊടുങ്ങല്ലൂർ രാജാ തലപ്പിള്ളി രാജാക്കന്മാർ ചെങ്ങഴി നമ്പ്യാന്മാർ മുതലായവർ പ്രബലരായിരുന്നതും കൊച്ചി രാജാവിനെ ധിക്കരിക്കാൻ പോന്നത്ര ശക്തികളായിരുന്നതും സാമൂതിരി മുതലെടുക്കുകയായിരുന്നു.
അത്തരത്തിലൊരു നമ്പൂതിരിയായ പടിഞ്ഞാറ്റേടം നമ്പൂതിരിപ്പാടിന് ഒരു നാടുവാഴിയുടെ പദവി ഉള്ളയാളായിരുന്നു. അദ്ദേഹത്തിന്റെ സഹായത്തോടേ ആരും അറിയാതെ സാമൂതിരി പടയാളികളുമായി കോട്ടക്കരികിൽ വന്ന് പാർക്കുകയും രായ്ക്കുരാമാനം കോട്ട ഉപരോധിക്കുകയും രക്ഷയില്ലാതെ കൊച്ചീരാജാവ് മുറിയടച്ചിട്ട് ഇരിപ്പാവുകയുമായിരുന്നു.
എന്നാൽ ചില നമ്പൂതിരിമാർ അദ്ദേഹത്തെ അവിടെ നിന്ന് അപായം ഒന്നും കൂടാതെ രക്ഷപ്പെടുത്താൻ സഹായിച്ചു. ശക്തൻ തമ്പുരാൻ വരുന്നതു വരെ സാമൂതിരി ഭക്തരായ വടക്കുംന്നാഥൻ , പെരുമ്മനം യോഗാതിരിപ്പാടുമാരുടെ കൈകളിലായി തൃശ്ശൂരിന്റെ ഭരണം.
ഇക്കാലത്താണ് ടിപ്പു സുൽത്താൻ കേരളത്തിലെത്തുന്നത്. 1789 തൃശ്ശൂരിനെ സംബന്ധിച്ച് ഭയാനകമായ് വർഷമായിരുന്നു. നിരവധി കെട്ടിടങ്ങളും കൊട്ടാരങ്ങളും ക്ഷേത്രങ്ങളും ഈ പടയോട്ടത്തിൽ നശിപ്പിക്കപ്പെട്ടു.
ഭാരതപ്പുഴ,കരുവണ്ണൂർ പുഴ,ചാലക്കുടിപ്പുഴ,കേച്ചേരിയാർ,കുറുമാലി പുഴ എന്നിവയാണ് പ്രധാന നദികൾ.ഷോളയാർ,പറമ്പിക്കുളം,കരിയാർ, കാരപ്പാറ എന്നിവ ജില്ലയിലെ ഏറ്റവും നീളം കൂടിയ നദിയായ ചാലക്കുടിപ്പുഴ പോഷകനദികൾ ആണ്. ഷോളയാർ.പെരിങ്ങൽകുത്ത് എന്നീ ജലവൈദ്യുത പദ്ധതികൾ ഇവിടെയാണ്.
വിനോദസഞ്ചാര കേന്ദ്രങ്ങൾ
- നെഹ്രുപാർക്ക്,തൃശൂർ
- ചേറ്റുവ വഴിയോര വിശ്രമകേന്ദ്രം
- ഡ്രീം വേൾഡ് വാട്ടർ പാർക്ക്
- സിൽ വർ സ്റ്റോം വാട്ടർ തീം പാർക്ക്
- അതിരപ്പിള്ളി വെള്ളച്ചാട്ടം
- പ്രശസ്തമായ ചവക്കാട് ബീച്
- സ്നേഹതീരം ബീച്ച് റെസോർട്സ്, തളിക്കുളം
- മുനയ്ക്കൽ ബീച്ച്, അഴീക്കോട്
- മറൈൻ വേൾഡ് ,പഞ്ചവടി
എറണാകുളം
കേരളം സംസ്ഥാനമായി നിലവിൽവന്നശേഷം പഴയ നാട്ടുരാജ്യങ്ങളായ തിരുവിതാംകൂർ, കൊച്ചി എന്നിവയിലെ പ്രദേശങ്ങൾ കൂട്ടിച്ചേർത്ത് 1958 ഏപ്രിൽ ഒന്നിനാണ് എറണാകുളം ജില്ല രൂപീകൃതമായത്.
കൊച്ചി രാജ്യത്തുനിന്നുള്ള പ്രദേശങ്ങളാണ്‌ പ്രധാനമായും ജില്ലയ്ക്കു കീഴിൽ വന്നത്. ഇടുക്കി ജില്ല രൂപീകൃതമാകും മുൻപ് തൊടുപുഴ താലൂക്കും എറണാകുളം ജില്ലാപരിധിയിലായിരുന്നു.
കേരളത്തിലെ പതിനാല്‌ ജില്ലകളിലൊന്ന്. മദ്ധ്യകേരളത്തിൽ സ്ഥിതി ചെയ്യുന്ന ഈ ജില്ല കേരളത്തിന്റെ വാണിജ്യ തലസ്ഥാനം എന്നറിയപ്പെടുന്നു.
സംസ്ഥാനത്തെ ഏറ്റവും വലിയ നഗരവും വ്യാവസായികമേഖലയുമായ കൊച്ചി, ചരിത്രപരമായി പ്രാധാന്യമുള്ള മട്ടാഞ്ചേരി, തൃപ്പൂണിത്തുറ എന്നീ പ്രദേശങ്ങളുടെ സാന്നിദ്ധ്യം ഈ ജില്ലയെ പ്രാധാന്യമേറിയതാക്കുന്നു.
പടിഞ്ഞാറ് അറബിക്കടൽ, വടക്ക് തൃശൂർ ജില്ല, കിഴക്ക് ഇടുക്കി ജില്ല, തെക്ക് കോട്ടയം, ആലപ്പുഴ ജില്ലകൾ എന്നിവയാണ് എറണാകുളത്തിന്റെ അതിർത്തികൾ.
കൊച്ചി നഗരത്തിലെ ഏറ്റവും നാഗരികമായ പ്രദേശം ആണ് എറണാകുളം. എറണാകുളം ജില്ലയുടെ ആസ്ഥാനം ഏറണാകുളം നഗരത്തിലായിരുന്നെങ്കിലും ഇപ്പോൾ നഗരത്തിനു കിഴക്കുഭാഗത്തായുള്ള കാക്കനാട് എന്ന സ്ഥലത്താണ് സ്ഥിതിചെയ്യുന്നത്. കേരളത്തിന്റെ വാണിജ്യ തലസ്ഥാനമാണ് എറണാകുളം.
വിനോദസഞ്ചാര കേന്ദ്രങ്ങൾ
- ചെറായി ബീച്ച്
- ഹിൽ പാലസ്
- വൈപീൻ ദ്വീപ്
- തട്ടേക്കാട് പക്ഷി സങ്കേതം
- ഡേവിഡ് ഹാൾ ആർട്ട് ഗാലറി
- ഫോക്ലോർ മ്യൂസിയം
- സാന്താക്രൂസ് ബസിലിക്ക
- രാജകുമാരി തെരുവ്
ഇടുക്കി
കുറവൻ, കുറത്തി എന്നീ മലകൾക്കിടയിലുള്ള ഇടുക്കിലാണ് ഇന്ത്യയിലെ ഏറ്റവും വലിയ കമാനാകാര അണക്കെട്ടായ ഇടുക്കി അണക്കെട്ട് നിർമ്മിച്ചിരിക്കുന്നത്. ഈ ഇടുക്ക് എന്ന വാക്കിൽ നിന്നാണ് ഇടുക്കി എന്ന പേര് ഉണ്ടായത്.
വടക്ക് തൃശ്ശൂർ ജില്ല, തമിഴ്‌നാട്ടിലെ കോയമ്പത്തൂർ ജില്ല, കിഴക്ക് തമിഴ്‌നാട്ടിലെ മധുര ജില്ല, പടിഞ്ഞാറ് എറണാകുളം, കോട്ടയം ജില്ലകൾ, തെക്ക് പത്തനംതിട്ട ജില്ലയുമാണ് ഇടുക്കി ജില്ലയുടെ അതിർത്തികൾ.കോട്ടയം ജില്ലയിൽ ഉൾപ്പെട്ടിരുന്ന ദേവീകുളം, ഉടുമ്പഞ്ചോല, പീരുമേട് എന്നീ താലൂക്കുകളേയും എറണാകുളം ജില്ലയിൽ ആയിരുന്ന തൊടുപുഴ താലൂക്കിലെ മഞ്ഞല്ലൂരും കല്ലൂർക്കാടും ഒഴികെയുള്ള പ്രദേശങ്ങളും കൂട്ടിച്ചേർത്ത് 1972 ജനുവരി 26 നാണ് ഇടുക്കി ജില്ല രൂപം കോണ്ടത്.
തുടക്കത്തിൽ കോട്ടയമായിരുന്നു ജില്ലാ ആസ്ഥാനം. 1976 ലാണ് തൊടുപുഴ താലൂക്കിലെ പൈനാവിലേക്ക് ജില്ലാ ആസ്ഥാനം മാറ്റിയത്.
എത്രവർണ്ണിച്ചാലും മതിവരാത്ത പ്രകൃതിരമണീയമായ ഈ ഭൂപ്രദേശത്തിന്റെ ആദ്യകാല ചരിത്രം അനുസരിച്ച് ഈ പ്രദേശം ചേരസാമ്രാജ്യത്തിന്റെ ഭാഗമായിരുന്നു.
പിന്നീട് ഇത് പൂഞ്ഞാർ രാജാവിന്റെ കീഴിലായിരുന്നു. തോട്ടം മേഖലയിലേക്കുള്ള വിദേശികളുടെ വരവോടുകൂടി ഇടുക്കിയുടെ ആധുനിക ചരിത്രം ആരംഭിക്കുന്നു.
കേരളത്തിന്റെ മധ്യഭാഗത്തായി സ്ഥിതി ചെയ്യുന്ന ജില്ലയാണ് ഇടുക്കി ജില്ല. ആസ്ഥാനം പൈനാവ്. തൊടുപുഴ, കട്ടപ്പന, അടിമാലി എന്നിവയാണ് ജില്ലയിലെ മറ്റു പ്രധാന പട്ടണങ്ങൾ.
4358 ച.കി. വിസ്തീർണ്ണമുള്ള (ഇത് കേരള സംസ്ഥാനത്തിന്റെ 11 ശതമാനം വരും) ഇടുക്കി ജില്ലയാണ് കേരളത്തിലെ ഏറ്റവും വലിയ രണ്ടാമത്തെ ജില്ല.
ഇടുക്കി ജില്ലയുടെ 50 ശതമാനത്തിലധികവും സംരക്ഷിത വനഭൂമിയാണ്. തീവണ്ടിപ്പാത ഇല്ലാത്ത കേരളത്തിലെ രണ്ടു ജില്ലകളിൽ ഒന്നാണ്‌ ഇത് .
കേരളത്തിലെ വയനാടൊഴികെയുള്ള മറ്റു ജില്ലകളിൽ നിന്നും തികച്ചും വ്യത്യസ്തമായ ഭൂപ്രകൃതിയാണ് ഈ ജില്ലക്കുള്ളത്.
ജില്ലയുടെ 97 ശതമാനം പ്രദേശങ്ങളും കാടുകളും മലകളും കൊണ്ട് നിറഞ്ഞിരിക്കുന്നു. താഴ്ന്ന ഭൂപ്രദേശങ്ങൾ തീരെ ഇല്ല. 50% പ്രദേശവും കാടുകളാണ്.
കേരളത്തിലെ ഏറ്റവും പ്രകൃതിരമണീയമായ ജില്ലകളിലൊന്നാണ് ഇടുക്കി. വന്യമൃഗ സംരക്ഷണ കേന്ദ്രങ്ങൾ, ഹിൽ സ്റ്റേഷനുകൾ, അണക്കെട്ടുകൾ, തോട്ടങ്ങളിലൂടെയുള്ള വിനോദയാത്ര, മലകയറ്റം, ആനസവാരി മുതലായവയാണ് വിനോദസഞ്ചാരികളെ ആകർഷിക്കുന്ന ഘടകങ്ങൾ. മൂന്നാർ ഹിൽ സ്റ്റേഷൻ,ഇടുക്കി അണക്കെട്ട്, തേക്കടി വന്യമൃഗസംരക്ഷണകേന്ദ്രം, പീരുമേട് വാഗമൺ എന്നിവയാണ് പ്രധാന വിനോദസഞ്ചാരകേന്ദ്രങ്ങൾ.
കൂടാതെ വിനോദ സഞ്ചാരികളുടെ ശ്രദ്ധയാകർഷിക്കുന്ന ധാരാളം സ്ഥലങ്ങൾ വേറെയുമുണ്ട്. രാമക്കൽമേട്, ചതുരംഗപ്പാറമേട്, രാജാപ്പാറ, ആനയിറങ്കൽ, പഴയ ദേവികുളം, ചീയപ്പാറ/വാളറ വെള്ളച്ചാട്ടം, തൊമ്മൻ കുത്ത്, നാടുകാണി വ്യൂ പോയിന്റ്, പരുന്തുമ്പാറ, അഞ്ചുരുളി, കല്ല്യാണത്തണ്ട്, മാട്ടുപ്പെട്ടി, കുണ്ടള, എക്കോ പോയിന്റ്, ടോപ് സ്റ്റേഷൻ, ചിന്നാറ് വന്യമൃഗസങ്കേതം, രാജമല, തുടങ്ങിയവ ഇവയിൽ ചിലത് മാത്രം.
സമീപകാലത്തായി ഫാം ടൂറിസവും പ്രശസ്തിയാർജ്ജിച്ചുവരുന്നുണ്ട്. ജില്ലയിലെ കുമളിക്ക് അടുത്തുള്ള അണക്കരയെ ഗ്ലോബൽ ടൂറിസം വില്ലേജായി പ്രഖ്യാപിച്ചിട്ടുണ്ട്.
കോട്ടയം
തെക്കൻ-മധ്യ കേരളത്തിലെ ഒരു പ്രധാന നഗരമാണ് കോട്ടയം. കോട്ടയം ജില്ലയുടെ ആസ്ഥാനമാണ് ഈ നഗരം. നഗരത്തിന്റെ കേന്ദ്ര ബിന്ദുവാണ് തിരുനക്കര.
കോട്ടയത്തിന്റെ പുസ്തക പ്രസിദ്ധീകരണ മേഖലയിലുള്ള പാരമ്പര്യം കണക്കിലെടുത്ത് ഈ നഗരം “അക്ഷര നഗരി” എന്ന അപരനാമത്തിലും അറിയപ്പെടുന്നു.
ഇന്ത്യയിലാദ്യമായി സമ്പൂർണ്ണസാക്ഷരത കൈവരിച്ച നഗരമാണ് കോട്ടയം.
കോട്ടയം ദൈവത്തിന്റെ സ്വന്തം നാട് എന്ന കേരളത്തിന്റെ വിശേഷണത്തിന് തിളക്കം കൂട്ടുന്ന പ്രകൃതി സൗന്ദര്യം കൊണ്ടും ഇന്ത്യയിലെ തന്നെ ഏറ്റവും ഗുണമേന്മയുള്ള സ്വാഭാവിക റബ്ഭറിന്റെ ഉത്പാദന കേന്ദ്രം എന്ന നിലയിലും ഏറെ പ്രശസ്തി നേടിയ ജില്ലയാണ് കോട്ടയം.
പടിഞ്ഞാറെ അതിർത്തിയിലെ വേമ്പനാട്ടുകായലും കിഴക്കൻ പ്രദേശങ്ങളിലെ ഹരിതാഭമായ കുന്നും മലകളും ജലസമൃദ്ധമായ പുഴകളും അരുവികളും വിനോദ സഞ്ചാരികളെ എന്നും ആകർഷിച്ചിട്ടുണ്ട്.
കേരളത്തിലെ പുസ്തക പ്രസാധക രംഗത്തും ലോക പ്രശസ്തമായ പത്ര മാസികകളുടെ പ്രസിദ്ധീകരണത്തിലും സമാനതകളില്ലാത്ത മുന്നേറ്റം തുടരുന്ന ജില്ല അക്ഷര നഗരി എന്ന ചെല്ലപ്പേരിലും അറിയപ്പെടുന്നു.
സമ്പൂർണ്ണ സാക്ഷരത നേടിയ ആദ്യത്തെ മുനിസിപ്പൽ ടൗണും ആദ്യ ജില്ലയുമാണ് കോട്ടയം.
രാഷ്ട്രപിതാവായ മഹാത്മാ ഗാന്ധിയുടെ സ്വപ്നസാക്ഷാത്ക്കാരമെന്നു വിശേഷിപ്പിക്കാവുന്ന വിധത്തിൽ പിന്നോക്ക വിഭാഗത്തിൽ ജനിച്ച് പ്രതികൂല സാഹചര്യങ്ങളോട പോരാടി ഇന്ത്യയുടെ പ്രഥമ പൗരനായി വളർന്ന ശ്രീ കെ ആർ നാരായണൻ, സുപ്രീംകോടതി ചീഫ് ജസ്റ്റീസ് ശ്രീ.കെ.ജി ബാലകൃഷ്ണൻ,ലളിതമായ പദപ്രയോഗം കൊണ്ട് സാധാരണ മനുഷ്യജീവിതത്തിന്റെ ജിവൻ തുടിക്കുന്ന വാഗ്മയ ചിത്രങ്ങൾ കോറിയിട്ട വിശ്വവിഖ്യാത സാഹിത്യ കാരൻ ശ്രീ.വൈക്കം മുഹമ്മദ് ബഷീർ സാധാരണക്കാരന്റെ വായനാശീലത്തെ പരിപോഷിപ്പിച്ച സർവ്വശ്രീ മുട്ടത്തുവർക്കി, ചെമ്പിൽ ജോൺ, കവി പാലാ നാരായണൻനായർ,പത്രത്തിന്റെ കുലപതി ശ്രീ.കണ്ടത്തിൽ വർഗ്ഗീസ് മാപ്പിള, ശ്രീമതി അക്കാമ്മ ചെറിയാൻ,ശ്രീ.മന്നത്തു പത്മനാഭൻ, അരുന്ധതി റോയ് തുടങ്ങി സാമൂഹ്യ രാഷ്ട്രീയ സാംസ്ക്കാരിക രംഗത്ത് ശ്രദ്ധേയരായ ഒട്ടേറെ മഹാരഥൻമാരുടെ ജന്മം കൊണ്ടും അനുഗ്രഹീതമായ ജില്ലയാണ് കോട്ടയം.
ആലപ്പുഴ
കേരളത്തിലെ ഒരു തീരദേശജില്ലയാണ് ആലപ്പുഴ. ആലപ്പുഴ നഗരമാണ് ഈ ജില്ലയുടെ ആസ്ഥാനം. 1957 ഓഗസ്റ്റ് 17 നാണ് ജില്ല രൂപീകൃതമായത്.
1990-ലാണ് ആലപ്പി എന്ന ഇതിന്റെ ഔദ്യോഗിക ഇംഗ്ലീഷ് നാമധേയം ആലപ്പുഴ എന്നാക്കി മാറ്റിയത്.
കേരളത്തിലെ പ്രധാനപ്പെട്ട വിനോദസഞ്ചാരകേന്ദ്രമാണ് ആലപ്പുഴ. കൂടാതെ കയർ വ്യവസായത്തിനും പേരുകേട്ടതാണ്.
കേരളത്തിലെ ഒട്ടുമിക്ക കയർവ്യവസായസ്ഥാപനങ്ങളും ജില്ലയിലാണ്. കേരളത്തിലെ കമ്മ്യൂണിസ്റ്റ് പ്രസ്ഥാനത്തിന്റെ ഈറ്റില്ലമായി ആലപ്പുഴ ജില്ല അറിയപ്പെടുന്നു.
കേരളത്തിലെ ഏറ്റവും ജനസാന്ദ്രതയേറിയ ജില്ലയാണ് ആലപ്പുഴ. ജില്ലയുടെ 29.46% പ്രദേശവും നഗരപ്രദേശമാണ്. ചേർത്തല, അമ്പലപ്പുഴ, കുട്ടനാട്, കാർത്തികപ്പള്ളി, ചെങ്ങന്നൂർ, മാവേലിക്കര എന്നിവയാണ് ജില്ലയിലെ താലൂക്കുകൾ, 91 വില്ലേജുകളും ഉണ്ട്.
ജില്ലയുടെ ആസ്ഥാനമായ ആലപ്പുഴ നഗരം മനോഹരമായ കായലുകളും കനാലുകളും കൊണ്ട് സമ്പന്നമാണ്, കേരളത്തിൽ വനം ഇല്ലാത്ത ഏക ജില്ലയാണ് ആലപ്പുഴ.
നേരത്തേ ഈ ജില്ലയുടെ ഭാഗമായിരുന്ന തിരുവല്ല താലൂക്കും ചെങ്ങന്നൂർ താലൂക്കിലെ ആറന്മുള കിടങ്ങന്നൂർ, മെഴുവേലി, കുളനട എന്നീ വില്ലേജുകളും മാവേലിക്കര താലൂക്കിലെ പന്തളം തെക്കേക്കര, തോന്നല്ലൂർ വില്ലേജുകളും 1983-ൽ രൂപീകൃതമായ പത്തനംതിട്ട ജില്ലയിൽ ലയിപ്പിച്ചു.
വടക്ക് എറണാകുളം, വടക്ക് കിഴക്ക് കോട്ടയം, കിഴക്ക് പത്തനംതിട്ട തെക്ക് കൊല്ലം എന്നിവയാണ് അതിർത്തി ജില്ലകള്‍.
2011 സെൻസസ് പ്രകാരം ജില്ലയിലെ ആകെ ജനസംഖ്യ 21,27,789 ആണ്.
അതിൽ 11,14,647 സ്ത്രീകളും 10,13,142 പുരുഷന്മാരുമാണ്.
ജില്ലയുടെ ജനസാന്ദ്രത സ്ക്വയർ കിലോമീറ്ററിന് 1504 ആണ്.സാക്ഷരതാ നിരക്ക് 95.72 ശതമാനവും അതിൽ സ്ത്രീ സാക്ഷരത 94.24 ശതമാനവും പുരുഷ സാക്ഷരത 97.36 ശതമാനവുമാണ്.
പട്ടികജാതി പട്ടികവർഗ്ഗ വിഭാഗക്കാർ യഥാക്രമം ആകെ ജനസംഖ്യയുടെ 9.45 ശതമാനവും 0.15 ശതമാനവുമാണ്. ഇത് മറ്റു ജില്ലകളെ അപേക്ഷിച്ച് വളരെ കുറവാണ്.ആലപ്പുഴ ജില്ലയെ ആലപ്പുഴ, ചെങ്ങന്നൂർ എന്നിങ്ങനെ രണ്ട് റവന്യൂ ഭാഗങ്ങളായി തിരിച്ചിരിക്കുന്നു.ഇവയെ അമ്പലപ്പുഴ, കുട്ടനാട്, ചെങ്ങന്നൂർ, കായംകുളം, മാവേലിക്കര, ചേർത്തല എന്നിങ്ങനെ 6 താലൂക്കുകളായും തിരിച്ചിരിക്കുന്നു.
93 വില്ലേജുകൾ ഉൾക്കൊള്ളുന്നതാണ് ഈ താലൂക്കുകൾ.ആലപ്പുഴ ജില്ലയിൽ ആകെ 91 തദ്ദേശ സ്വയംഭരണ സ്ഥാപനങ്ങളാണ് ഉള്ളത്.
അതിൽ 72 ഗ്രാമ പഞ്ചയത്തുകളും 12 ബ്ലോക്ക് പഞ്ചായത്തുകളും 6 നഗരസഭകളും ജില്ലാ പഞ്ചായത്തും ഉൾപ്പെടുന്നു.
തടാകങ്ങളും നദികളും കനാലുകളും നിറഞ്ഞ ഭൂപ്രകൃതിയാണ് ആലപ്പുഴ ജില്ലയ്ക്കുള്ളത്.ജില്ലയിൽ പർവ്വതങ്ങളോ കുന്നുകളോ ഇല്ല, എന്നാൽ ചിതറിക്കിടക്കുന്ന പാറക്കുന്നുകൾ ഭരണിക്കാവിനും ചെങ്ങന്നൂർ ബ്ലോക്ക് പഞ്ചായത്തുകൾക്കുമിടയിൽ കാണപ്പെടുന്നുണ്ട്.
ജില്ലയുടെ 80 ശതമാനവും താഴ്ന്ന പ്രദേശവും, ബാക്കിയുള്ള പ്രദേശം ഇടനാടുമാണ്. മലമ്പ്രദേശമോ വനഭൂമിയോ ഇല്ലാത്ത സംസ്ഥാനത്തെ ഏക ജില്ലയാണ് ആലപ്പുഴ.
ജില്ലയുടെ ഭൂമിശാസ്ത്ര വിസ്തൃതിയുടെ 10 ശതമാനത്തിൽ ജലാശയങ്ങൾ വ്യാപിച്ചിരിക്കുന്നു. കുട്ടനാട് പ്രദേശം സമുദ്രനിരപ്പിന് താഴെയാണ്.
വിനോദസഞ്ചാര കേന്ദ്രങ്ങൾ
- അമ്പലപ്പുഴ
- മാരാരി ബീച്ച്
- മണ്ണാറശാല
- ആലപ്പുഴ ബീച്ച്
- പാതിരാമണല്‍
- കുട്ടനാട്
- വേമ്പനാട് കായല്‍
- പാണ്ഡ‌വന്‍ പാറ
- കരുമാടിക്കുട്ടന്‍
- അര്‍ത്തുങ്കല്‍
പത്തനംതിട്ട
1982 നവംബര്‍ 1-നാണ് കേരള സംസ്ഥാനത്തിലെ പതിമൂന്നാമത്തെ ജില്ലയായി പത്തനംതിട്ട ജില്ല നിലവില്‍ വന്നത്.
ഇന്ന് പത്തനംതിട്ട ജില്ലയിലുള്‍പ്പെടുന്ന ഭൂരിഭാഗം പ്രദേശങ്ങളും പഴയ കൊല്ലം ജില്ലയുടെ ഭാഗമായിരുന്നു.
കൊല്ലം ജില്ലയിലെ കുന്നത്തൂര്‍ താലൂക്കിന്റെ ഒരു വലിയ ഭാഗവും, ഇടുക്കി ജില്ലയിലെ പീരുമേട് താലൂക്കിന്റെ ഒരു ഭാഗവും, ആലപ്പുഴ ജില്ലയില്‍ ഉള്‍പ്പെട്ടിരുന്ന തിരുവല്ലാ താലൂക്കും, മാവേലിക്കര താലൂക്കിന്റെ കുറച്ചു ഭാഗങ്ങളും കൂട്ടിച്ചേര്‍ത്തുകൊണ്ടാണ് പത്തനംതിട്ട ജില്ലയ്ക്ക് രൂപം നല്‍കിയത്.
പത്തനം എന്നാല്‍ മനോഹരമായ വീടുകള്‍ എന്നും തിട്ട എന്നാല്‍ നദീതടം എന്നുമാണ് അര്‍ത്ഥം.
നദീതീരത്ത് നിരനിരയായി വീടുകളുള്ള സ്ഥലംഎന്നതില്‍ നിന്നാണ് പത്തനംതിട്ട എന്ന സ്ഥലനാമം ഉണ്ടായതെന്ന് കരുതാം.
വടക്കുഭാഗത്ത് കോട്ടയം, ഇടുക്കി ജില്ലകള്‍ വരേയും, കിഴക്കുഭാഗത്ത് തമിഴ്നാട് സംസ്ഥാനം വരേയും, തെക്കുഭാഗത്ത് കൊല്ലം ജില്ല വരേയും, പടിഞ്ഞാറുഭാഗത്ത് ആലപ്പുഴ ജില്ല വരേയും അതിരുകള്‍ വ്യാപിച്ചുകിടക്കുന്ന പത്തനംതിട്ട ജില്ലയ്ക്ക് 2642 ചതുരശ്രകിലോമീറ്റര്‍ വിസ്തീര്‍ണ്ണമുണ്ട്.
മല്ലപ്പള്ളി, പുളിക്കീഴ്, കോയിപ്രം, ഇലന്തൂര്‍, റാന്നി, കോന്നി, പന്തളം, പറക്കോട് എന്നിങ്ങനെ 8 ബ്ളോക്ക് പഞ്ചായത്തുകളാണ് ഈ ജില്ലയിലുള്ളത്.
ഈ ജില്ലയിലെ 8 ബ്ളോക്കുകളിലായി 54 ഗ്രാമപഞ്ചായത്തുകളും 68 വില്ലേജുകളും സ്ഥിതി ചെയ്യുന്നു. പത്തനംതിട്ട, തിരുവല്ലാ, അടൂര്‍ എന്നിങ്ങനെ 3 മുനിസിപ്പാലിറ്റികള്‍ പത്തനംതിട്ട ജില്ലയിലുണ്ട്.
പത്തനംതിട്ട, തിരുവല്ലാ, അടൂര്‍, മല്ലപ്പള്ളി, റാന്നി എന്നിങ്ങനെ അഞ്ച് താലൂക്കുകളിലായി ഈ ജില്ലയിലെ തദ്ദേശ സ്വയംഭരണസ്ഥാപനങ്ങള്‍ വ്യാപിച്ചുകിടക്കുന്നു.
ഭൂപ്രകൃതിയനുസരിച്ച് പത്തനംതിട്ട ജില്ലയെ മലനാട്, ഇടനാട്, തീരസമതലം എന്നിങ്ങനെ മൂന്നായി തരം തിരിക്കാം.
ജില്ലയുടെ കിഴക്കനതിര്‍ത്തികള്‍ പശ്ചിമഘട്ടത്തിലെ ഉയര്‍ന്ന മലനിരകളാണ്. ഉയര്‍ന്ന മലനാട് പ്രദേശത്തുനിന്നും പടിഞ്ഞാറോട്ട് പോകുന്തോറും ഭൂമി ചരിഞ്ഞാണ് കിടക്കുന്നത്.
ഈ ചരിവ് ഇടനാട് പ്രദേശത്തോടടുക്കുന്തോറും കുറഞ്ഞുവരികയും തീരപ്രദേശത്തെത്തുമ്പോള്‍ പൂര്‍ണ്ണമായും ഇല്ലാതാവുകയും സമതലരൂപം കൈവരിക്കുകയും ചെയ്യുന്നു. പത്തനംതിട്ട ജില്ലയുടെ ആകെ ഭൂവിസ്തൃതിയില്‍ അഞ്ചു ശതമാനത്തിലേറെ ഭാഗം വനമേഖലയാണ്.
കോടിക്കണക്കിന് തീര്‍ത്ഥാടകരെത്തുന്ന ഭാരതത്തിലെ പ്രമുഖ തീര്‍ത്ഥാടനകേന്ദ്രമായ ശബരിമല അയ്യപ്പക്ഷേത്രം സ്ഥിതി ചെയ്യുന്നത് പത്തനംതിട്ട ജില്ലയിലാണ്.
ശബരിമല ശ്രീ അയ്യപ്പന്റെ ഐതിഹ്യവുമായി ബന്ധമുള്ള അച്ചന്‍കോവിലാര്‍ നദി ഈ ജില്ലയുടെ ഹൃദയഭാഗത്തു കൂടിയാണ് ഒഴുകുന്നത്. അയ്യപ്പചരിതത്തില്‍ പരാമര്‍ശിക്കുന്ന പല പ്രദേശങ്ങളും ഇന്ന് പത്തനംതിട്ട ജില്ലയുടെ ഭാഗമാണ്.
കൊല്ലം
കൊല്ലം കേരളത്തിലെ ഒരു നഗരമാണ്. കൊല്ലം ജില്ലയുടെ ആസ്ഥാനം. മുൻപ് ക്വയ്‍ലോൺ എന്നും ദേശിങ്ങനാട് എന്നും താർഷിഷ് എന്നും അറിയപ്പെട്ടിരുന്നു.
പത്തൊമ്പതാം നൂറ്റാണ്ടിൽ തിരുവിതാംകൂർ രാജ്യത്തിലെ ഒരു പ്രധാനപ്പെട്ട വാണിജ്യ-വ്യാവസായിക കേന്ദ്രമായ ഈ നഗരം പ്രശസ്തിനേടി.
പ്രാചീനകാലം മുതലേ പ്രമുഖ തുറമുഖമായിരുന്നു കൊല്ലം. അറബികൾ, റോമാക്കാർ, ചൈനാക്കാർ, ഗ്രീക്കുകാർ, ഫിനീഷ്യന്മാർ, പേർഷ്യാക്കാർ തുടങ്ങിയവർ പുരാതന കാലം മുതൽക്കേ കൊല്ലം തുറമുഖവുമായി സജീവമായ വാണിജ്യബന്ധം പുലർത്തിയിരുന്നു.
വിസ്തീര്‍ണം കണക്കാക്കുമ്പോള്‍ കേരളത്തിലെ ജില്ലകളില്‍ മൂന്നാം സ്ഥാനത്തും ജനസംഖ്യാനുപാതപ്രകാരം ഒന്നാംസ്ഥാനത്തും നിന്നിരുന്ന കൊല്ലം, കിഴക്കന്‍ഭാഗങ്ങള്‍ പുതുതായി രൂപംകൊണ്ട പത്തനംതിട്ട ജില്ലയില്‍ ഉള്‍പ്പെടുത്തപ്പെട്ടതിനെത്തുടര്‍ന്ന് വ്യാപ്തിയിലും ജനസംഖ്യയിലും പിന്തള്ളപ്പെട്ടു.
സംസ്ഥാനത്തിലെ 560 കി.മീ. വരുന്ന കടലോരത്തില്‍ 41.84 കി.മീ. ദൂരം ഈ ജില്ലയ്ക്കുള്ളിലാണ്.
കേരളത്തിലെ ധാതുമണല്‍ നിക്ഷേപങ്ങളുടെ കലവറയെന്ന നിലയില്‍ അതിപ്രാധാന്യമര്‍ഹിക്കുന്ന പ്രദേശമാണ് ഈ തീരമേഖല.
ജനസാന്ദ്രത: 1056 ച.കി.മീ. പഴയതിരുവിതാംകൂര്‍ സംസ്ഥാനത്തില്‍ ഭരണവ്യവസ്ഥപ്രകാരം രണ്ടു റവന്യൂ ഡിവിഷനുകളാണുണ്ടായിരുന്നത്.
ഇവയില്‍ തെക്കേഡിവിഷന്റെ ആസ്ഥാനം കൊല്ലം ആയിരുന്നു. ഓരോ ഡിവിഷനും ദിവാന്‍ പേഷ്കാര്‍ എന്ന പദവിയിലുള്ള പ്രത്യേകോദ്യോഗസ്ഥന്റെ ഭരണാധികാരത്തിലായിരുന്നു.
പിൽക്കാലത്ത് തിരുവനന്തപുരം, കൊല്ലം, കോട്ടയം എന്നിവിടങ്ങളില്‍ ആസ്ഥാനമായി മൂന്നു ഡിവിഷനുകളുണ്ടാവുകയും ഓരോന്നിന്റെയും ഭരണം ഓരോ ഡിവിഷന്‍ പേഷ്കാരെ ഏല്പിക്കുകയും ചെയ്തു.
തിരുവിതാംകൂറും കൊച്ചിയും സംയോജിച്ച് ഒരു സംസ്ഥാനമായിത്തീര്‍ന്ന (1949) പ്പോഴാണ് കൊല്ലത്തിന് ജില്ലാപദവി കൈവന്നത്.
ഇക്കാലത്ത് ജില്ലയുടെ വ്യാപ്തി 4,36,736 ച.കി.മീ, ആയിരുന്നു. കൊല്ലം, കൊട്ടാരക്കര, പത്തനാപുരം, ചെങ്കോട്ട, കുന്നത്തൂര്‍, പത്തനംതിട്ട, കാര്‍ത്തികപ്പള്ളി, കരുനാഗപ്പള്ളി, മാവേലിക്കര, തിരുവല്ല, അമ്പലപ്പുഴ, ചേര്‍ത്തല എന്നീ പന്ത്രണ്ടു താലൂക്കുകള്‍ കൊല്ലം ജില്ലയുടെ ഭാഗമായി ഉണ്ടായിരുന്നു. 1956-ല്‍ സംസ്ഥാന പുനര്‍വിഭജനത്തെത്തുടര്‍ന്ന് ചെങ്കോട്ട താലൂക്ക് വേര്‍പെട്ട് അന്നത്തെ മദ്രാസ് സ്റ്റേറ്റിന്റെ ഭാഗമായിത്തീര്‍ന്നു.
അതോടൊപ്പം തിരുവല്ല താലൂക്ക് തിരുവല്ല, ചെങ്ങന്നൂര്‍ എന്നിങ്ങനെ രണ്ടു താലൂക്കുകളായി വിഭജിക്കപ്പെടുകയും ചെയ്തു. 1957 ആഗ.17-നു ആലപ്പുഴ ജില്ല നിലവില്‍വന്നതോടെ ചേര്‍ത്തല, അമ്പലപ്പുഴ, കാര്‍ത്തികപ്പള്ളി, മാവേലിക്കര, ചെങ്ങന്നൂര്‍, തിരുവല്ല എന്നീ താലൂക്കുകള്‍ കൊല്ലം ജില്ലയില്‍ നിന്നു വേര്‍പെടുത്തപ്പെട്ടു.
പത്തനംതിട്ട ജില്ലയുടെ രൂപവത്കരണ(1983 ജൂണ്‍ 9)ത്തോടുകൂടി പത്തനംതിട്ട താലൂക്കും മറ്റേതാനും ഭാഗങ്ങളും നഷ്ടമായി.
ജില്ലയുടെ ആകെ വിസ്തൃതിയിൽ മൂന്നിലൊന്ന് വനപ്രദേശമാണ്. ജില്ലയുടേ കിഴക്ക് ഭാഗത്തുള്ള പശ്ചിമ ഘട്ട പ്രദേശമാണ് വനഭുമിയിൽ ഭുരിഭാഗവും.
പത്തനാപുരം, പുനലൂർ , കൊട്ടരക്കര താലൂക്കുകളിലാണ് വനപ്രദേശമുള്ളത്. വനവിസ്തൃതിയുടെ അടിസ്ഥാനത്തിൽ വനമേഖലയെ 4 ഡിവിഷനുകളായി തിരിച്ചിരിക്കുന്നു.
ഇവയിൽ അച്ചൻകോവിൽ, തെന്മല, പുനലൂർ എന്നിവയുടെ പരിധി പൂർണ്ണമായും ജില്ലയിലാണ്. കുളത്തൂപ്പുഴ റേഞ്ചിന്റെ പ്രദേശങ്ങൾ തിരുവനന്തപുരം ഡിവിഷന്റെ പരിധിയിൽ കൂടി ഉൾപ്പെടുന്നു.
ജനവാസമുള്ള അച്ചൻകോവിൽ, റോസ്‍മല, ചെന്പനരുവി, കട്ടളപ്പാറ, വില്ലുമല ഗ്രാമങ്ങൾ വനത്തിന് നടുവിലാണ് സ്ഥിതി ചെയ്യുന്നത്.
തിരുവനന്തപുരം
കേരള സംസ്ഥാനത്തിന്റെ തലസ്ഥാനനഗരവും തിരുവനന്തപുരം ജില്ലയുടെ ആസ്ഥാനവുമാണ്‌ തിരുവനന്തപുരം അഥവാ ട്രിവാൻഡ്രം.
അനന്തപുരി എന്ന പേരിലും ഇത് അറിയപെടുന്നു. ഇന്ത്യൻ ഉപഭൂഖണ്ഡത്തിന്റെ പടിഞ്ഞാറൻ തീരത്ത് കേരളത്തിന്റെ തെക്കേ അറ്റത്തായാണ് ഈ നഗരം സ്ഥിതി ചെയ്യുന്നത്.
വളരെ ഭൂവൈവിധ്യവും, തിരക്കേറിയ വീഥികളും വാണിജ്യ മേഖലകളും ഉള്ള നഗരമാണ് തിരുവനന്തപുരം.
തന്മൂലം “നിത്യ ഹരിത നഗരം” എന്നാണ് ഇന്ത്യയുടെ രാഷ്ട്രപിതാവ് മഹാത്മാഗാന്ധി തിരുവനന്തപുരത്തെ വിശേഷിപ്പിച്ചത്.
നഗരത്തിന്റെ തന്നെ മുഖമുദ്രയായ അനന്തശായിയായ പത്മനാഭ സ്വാമിക്ഷേത്രമാണ് നഗരത്തിന് ഈ പേര് വരാൻ കാരണം.
ആയിരം തലയുള്ള അനന്തൻ എന്ന സർപ്പത്തിന്മേൽ വിശ്രമിക്കുന്ന മഹാവിഷ്ണുവാണ് പത്മനാഭസ്വാമി ക്ഷേത്രത്തിലെ പ്ര തിഷ്ഠ.
അനന്തന്റെപുരം (നഗരം) എന്നതിനോട് ബഹുമാനസൂചകമായി “തിരു’ ചേർത്തതുകൊണ്ടാണ് തിരുവനന്തപുരം എന്നുപേരുവന്നത്.സഹ്യപർവ്വത നിരകൾക്കും അറബിക്കടലിനും ഇടയിലായി സ്ഥിതിചെയ്യുന്ന തിരുവനന്തപുരം സമുദ്രനിരപ്പിൽ ഉള്ള സ്ഥലമാണ്.
ചെറുകുന്നുകളും, താഴ്വാരങ്ങളും ചേർന്നതാണ് ഉൾനാട്. കടൽ തീരവും, പുഴകളും മറ്റും അടങ്ങുന്നതാണ് തീരപ്രദേശം.
തിരുവനന്തപുരം ജില്ലയിലെതന്നെ ഏറ്റവും വലിയ ശുദ്ധജല തടാകമായ വെള്ളായണി തടാകം നഗരത്തിന്റെ പ്രാന്തപ്രദേശത്താണ്.
കരമനയാ‍റും കിള്ളിയാറും നഗരത്തിലൂടെ ഒഴുകുന്ന പ്രധാന പുഴകളാണ്.
